بالصدفــه وانا في سيفورا هيوستن ..الا أشوف الأمريكيات كل وحده وفي يدها علبه من هالماركه ..قلت خلي اشوف شسالفة هالعلبه اللي في يد كل وحده ..رحت صوب الماركه الا اشوف التجمع صوبها وكل وحده يا انها ماسكتلها قوطي أو تدور على درجه تناسبها من هالماركه!!
شالسالفه!!
خذت لي علبه وقريتها وسألت عنها ..
الماركه هي
bareMinerals
الله يسلمكم هذي ماركة منتجات مكياج صحيه خاليه من
المواد الحافظه والزيوت والعطور وبودرة التالك ومهيجات البشره
وهي مصنوعه من المعادن الخالصه 100%
والمعادن هذي طبعا مستخرجه من الطبيعه يعني من الارض ..ماتضر البشره حتى لو نمتي فيها - مكتوب عالعلبه انج تقدرين تنامين وانتي حاطه من هالمكياج وانتي متطمنه ان بشرتج مابتتأثر-الا بالعكس بتعالج البثور وحب الشباب بعد
((وايد ناس اعرفهم مايقدرون يعيشون بدون مكياج فالبيت و24 ساعه ولايقدرون يجابلون ازواجهم بدون مكياج وطبعا المكياج العادي يضر بشراتهم اذا ناموا فيه بس هذا لا ..بيستانسون عليه هالنوعيه من الناس))
تقدرين تتحكمين فيه يعني اذا تبين تحطين ميك اب ناتشورال وناعم جدا جدا حطي منه على خفيف ...واذا تبينه شوي اثقل حطي اكثر ..واذا تبينه ثقيل حطي أكثر وأكثر ..
مناسب جدا للي عندهم حساسيه من المكياج ومن اي شي يخلونه على ويههم ..
مناسب جدا للمرأه العامله اللي ماعندها وقت تحط كريمات اساس وفل ميك أب ,,ومناسب للي تحب الميك أب اللي مايبين انها حاطه شي وفي نفس الوقت معطيها رونق وجمال ناعم .
ومناسب جدا للكبار السن لأنه ناتشورال ويعطي تغطيه في نفس الوقت ولا يبين انها حاطه طبقات في ويهها مع ملمس ناعم مثل الحرير ويعطي لمعطه طبيعيه حلووه ((مب مثل ماك او كانيبو اذا وحده متقدمه في السن حطت منهم شوفوا التجاعيد وااااضحه وضوح الشمس))
ممكن تخلطينه بماي اذا بغيتي تغطيه كبيره مثل كريم الاساس
العلب اللي قلتلكم اني شفتهم عند الامريكيات منهم ثلاث درجات فاتح \متوسط \غامق ..
ومحتويات العلبه الواحده هي
1 - كريم فيتامين مغذي ومحضر البشره
2 - اربع درجات من الاساس ..وعلب الاساس هذي شكلها مثل اللووز باودر بس مب لووز باودر لا هو معادن طبيعيه وكل واحد له وظيفه
اثنين منهم درجتين فيهم حماية 15 من الشمس واحد شوي فاتح وواحد شوي غامق تختارين اللون اللي تحبينه منهم ..وتستخدمينه بالفرشاه اللي موجوده بالعلبه
والدرجه الثالثه درجه غامجه شوي مخصصه لتحديد الوجه ويستخدم بعد كبلاشر
والدرجه الرابعه لمعه نااااااااااااااعمه وكأنها سحريه ..تعطي رونق للوجه وكأنه لمعان طبيعي ..مب مثل لمعة المجه المعروفه لااااا هذي ولا يبين انج حاطه لمعه ابدا ..بس لنضارة الوجه
3- فرشاه صغيره لتوزيع نفس البودره اللي كتبتها فوق ككونسيلر و خافي البثور ..
4- فرشاه وسط لتوزيع البودره على كامل الوجه
5- فرشاه أكبر للتغطيه الجيده
6- دي في دي يوضح خطوات الاستعمال وباقي منتجات هالماركه
وسعرها بعد الخصم 60$
بس اخر اثنين اللي في الصوره مب من ضمن محتويات العلبه
طريقة الاستعمال لكل منتجاتهم فقط بثلاث خطوات
1- مرري الفرشاه على البودره
2- وانثري الزايد من الفرشاه
3- وزعي البودره اللي بالفرشاه على الوجه
وخلاص
تجربتي لها المنتج
رووووووووووووووووووووووعه صراحه
لأني انا مااحط ميك أب ثقيل الا فالمناسبات والزيارات .فأحتاج شي خفيف ويومي ومايضر بشرتي..قبل كنت استخدم من بوبي براوني بس كان ينشف بشرتي.. هاي عجبني أكثر صراحه ويهي ولا كأني حاطه ميك أب وفي نفس الوقت حلو ونضرومغطي العيوب مثل السواد تحت العيون وبعض اثار الحبوب الخفيفه
وناويه ان شاء الله اخذ حق الوالده وام زوجي احس بيعجبهم وايد ..
وكله كووووم والبودره المسائيه كوووم هذي انا اشوفها سحريه ..لأنها تعمل عمل كريم الليل ..بعني بعد تنظيف البشره وقبل النوم توزعين هالبودره عالوجه وتنامين واااااو احسها روعه ..
تره واااايد شركات يتنافسون على ميك أب المينيرال ..بس كل شركه تحط نسبه معينه 50% او 20% ,,,بس هذي الماركه 100% وخاليه من اي مواد مضره للبشره..اتوقع ديور وشانيل وغيرها بتتجه لها المجال بعد
اللي تبي الموقع تقوللي برسل لها عالخاص لأنهم عندهم وااايد اشياء غير هالعلبه (ميك أب كااااامل) وموجود فيديو بعد يوضح طرق الاستخدام
بس اضغطي على HOW TO
اتمنى موضوعي يعجبكم
الإثنين يناير 14, 2008 1:38 am